Raunfærnimat í hljóðvinnslu.

Kynningarfundur verður haldinn
mánudaginn 16. janúar 2012  kl. 17:00
í húsnæði Rafiðnaðarskólans, Stórhöfða 27.
(Gengið inn Grafarvogs megin)

 Ef þú starfar við upptökur, hljóðvinnslu eða mögnun og hefur gert það í nokkurn tíma þá er þetta eitthvað fyrir þig. (Bæklingur á PDF formi) 

Umsóknareyðublað um þátttöku í raunfærnimati í hljóðvinnslu

Best er að vista skjalið á skjáborðið og senda síðan útfyllt á

Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það.

Hvað er raunfærnimat?

Raunfærnimat er skipulagt ferli þar sem lagt er formlegt mat á alhliða þekkingu og færni einstaklings sem hann hefur aflað sér með t.d. starfsreynslu, námi, félagsstörfum og lífsreynslu. Markmiðið er að einstaklingur fái viðurkennda þá raunfærni sem hann býr yfir á ákveðnum tíma. 

Algengast er að raunfærnimat fari fram á móti námsskrá og til dæmis hafa yfir 500 einstaklingar lokið raunfærnimati á móti námsskrám í iðngreinum.

Raunfærnimat  í þessu verkefni er á móti viðmiðum sem eru búin til í atvinnulífinu og er það sjaldgæfara.

Mat og staðfesting á þekkingu og reynslu

Hægt er nálgast frekari upplýsingar um raunfærnimat á heimasíðu Fræðsluskrifstofu rafiðnaðarins www.fsraf.is.

Ef þú óskar eftir frekari upplýsingum um verkefnið er hægt að hafa samband við Ísleifur Árna Jakobsson hjá Fræðsluskrifstofu rafiðnaðarins í síma 580-5252 eða með því að senda póst á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það.

Ferillinn í verkefninu (áætlun vor 2012)

Þú kynnir þér verkefnið 

• Upplýsingafundur
• Ákvörðun um hvort þú sækir um
• Umsóknareyðublað
• Bókar viðtal við náms- og starfsráðgjafa

Þú ferð í viðtal við náms- og starfsráðgjafa

• Kynning á ferlinu
• Þú leggur fram gögn um reynslu
• Endanlegur hópur þátttakenda verður til

Þú skráir reynslu og leggur mat á þekkingu þína miðað við færniviðmið

• Skráir reynslu, fyrra nám og aðra þekkingu sem þú býrð yfir
• Sjálfsmat – þátttakandi leggur mat á færni út frá færniviðmiðum
• Samtal við stjórnanda eða samstarfsmann um sjálfsmat þitt

Þú ferð í raunfærnimat

• Raunfærnimat byggist á samtali milli þín og  þess sem er fagaðili
• Þar er lögð áhersla á að þú fáir tækifæri til að koma á framfæri þekkingu þinni og færni
• Þú getur verið beðin/n um að sýna færni þína, það geta verið lagðar fyrir þig lýsingar á aðstæðum og þú beðin/n að vinna úr þeim eða settar fram aðrar  aðferðir sem nýtast í því skyni að gera færni þína sýnilegri

Að loknu raunfærnimati

• Farið yfir niðurstöður með þér
• Þú færð í hendur staðfestingu á færni

Átt þú erindi?

Færniviðmiðin eru á tveimur þrepum.

3. þrep: Vinnur almennt undir leiðsögn annarra  en getur framkvæmt einfaldari  verk  á afmörkuðum sviðum.

Kröfur um aldur og starfsreynslu: 23 ára og þriggja  ára reynsla í hljóðvinnslu.

4. þrep: Vinnur sjálfstætt að  verkefnum, tekur  faglegar ákvarðanir, bregst  við óskum stjórnenda/verkkaupa, kemur að stýringu  verkefna og veitir ráðgjöf á sjálfstæðan hátt.

Kröfur  um  aldur og starfsreynslu:  25 ára og fimm  ára reynsla í hljóðvinnslu.

Ef þú hefur starfsreynslu og hefur ekki lokið námi á framhaldsskólastigi í hljóðvinnslu þá er þess virði að kynna sér málið.

Hver er tilgangurinn?

Undanfarið ár hefur verið unnið að því að skilgreina hvaða færnikröfur hljóðmenn þurfa að uppfylla í starfi sínu. Myndaður var faghópur sem samanstendur af einstaklingum úr ólíkum geirum hljóðvinnslu og hópur stjórnenda sem mótuðu kröfur um færni hljóðmanna.  Auk þess var tekið mið af námsskrá Tækniskólans-skóla atvinnulífsins. Nú liggja þessi færniviðmið fyrir og býðst þeim sem hafa starfsreynslu úr hljóðheimum að fara í raunfærnimat á móti þeim.

Eftir raunfærnimat fær einstaklingurinn skjal þar sem raunfærni hans er staðfest. Það skjal getur hann notað til að sýna fram á færni sína á núverandi  vinnustað, þegar hann sækir um vinnu eða þegar hann þarf að sýna fram á færni vegna verkefna.

Markmiðið er að eftir raunfærnimatið liggi fyrir skilgreining á færni viðkomandi einstaklings. Þessar upplýsingar getur hann einnig nýtt til að sækja frekari þekkingu ef hann telur þörf á.

Í stuttu máli, markmið raunfærnimats er að meta færni og gefa út staðfestingu á henni.

Hverjir standa að verkefninu?

Verkefnið er unnið að frumkvæði Félags tæknifólks í rafiðnaði en í stýrihópi sitja fulltrúar fyrirtækja  í hljóðvinnslu auk Tækniskólans - skóla atvinnulífsins og Fræðsluskrifstofu rafiðnaðarins.

Fræðslumiðstöð atvinnulífsins stýrir verkefninu og leggur til sérfræðiþekkingu vegna raunfærnimats en Mímir-símenntun sér um náms og starfsráðgjöf.

Verkefnið er hluti af Leonardoverkefninu REVOW - Viðurkenning á gildi starfa og er unnið með styrk frá  Starfsmenntaáætlun Evrópusambandsins og Starfsmenntaráði.